Azərbaycanda yeni idman klubu açıldı - Möhtəşəm şou və çıxışlar (Fotolar)
"ProSport" idman klubunun və zalının açılış mərasimi baş tutub.
Tədbirdə tanınmış şəxslər, video-blogerlər, yeniyetmə gimnastlar və onların valideynləri iştirak ediblər.
32gun.az xəbər verir ki, tədbirdə ilk olaraq, dövlət himni səsləndirilib. Daha sonra şəhidlərimizin xatirəsi yad edilib.
Açılışı klubun təsisçiləri beynəlxalq və milli dərəcəli hakim və məşqçilər Leyla Hüseynli ilə Samirə Səlimzadə edib.
Leyla Hüseynli çıxışı zamanı Dövlət Başçısı İlham Əliyevə, həmçinin ölkənin birinci vitse-prezidenti, Azərbaycan Gimnastika Federasiyasının prezidenti Mehriban xanım Əliyevaya təşəkkürünü bildirib.
"Cənab prezidentin, Mehriban xanım Əliyevanın dəstək və qayğısı nəticəsində ölkəmizdə idman inkişaf edir. Beynəlxalq arenalarda bayrağımız yüksəlir, himnimiz səsləndirilir. Bunun bariz nəticəsidir ki, gimnastlarımız ölkə xaricindəki yarışlardan hər zaman medallarla geri dönürlər".
Tədbirdə həmçinin məşhur animatorlar çıxış ediblər. Müxtəlif şou proqramları sərgilənib.
"ProSport" idman klubunda 3 yaşdan 12 yaşa qədər yeniyetmə qızlar bədii gimnastika ilə oğlanlar isə akrobatika ilə məşğul olacaqlar.
