Türkiyə prezidenti Rəcəb Tayyib Ərdoğan Birləşmiş Millətlər Təşkilatının Təhlükəsizlik Şurasının Qəzza gündəliyi ilə bağlı sabah keçiriləcək iclası öncəsi Birləşmiş Millətlər Təşkilatının baş katibi Antonio Quterreş ilə telefon danışığı aparıb.
32gun.az xəbər verir ki, rabitə müdirliyindən verilən açıqlamaya görə, telefon danışığı zamanı İsrailin qanunsuz hücumlarına qarşı beynəlxalq ictimaiyyətdən gözləntilər, humanitar böhranın həlli təklifləri və davamlı sülh üçün səylər müzakirə edilib.
Ərdoğan İsrailin beynəlxalq ictimaiyyətin gözü qarşısında beynəlxalq hüququ, müharibə qanununu və humanitar hüququ ehtiyatsızlıqla pozmağa davam etdiyini və beynəlxalq hüquq qarşısında törətdiyi cinayətlərə görə cavab verməli olduğunu bildirib.
Türkiyə prezidenti həmçinin İsrailin Qəzza hücumlarında həyatını itirən 100-dən çox BMT əməkdaşına görə Quterreşə başsağlığı verib. Quterreşin Rəfah Sərhəd Qapısına şəxsi səfərinin beynəlxalq ictimaiyyətin diqqətinin bu məsələyə yönəldilməsi baxımından faydalı olduğunu nəzərə çatdırıb.
Aysel Şirinova
