Milyonlarla manat dövlət vəsaiti hesabına tikilən Ağstafa Atçılıq kompleksində BİABIRÇILIQ - İcra başçısı hara baxır? (VİDEO)
2019-cu ildə Prezident İlham Əliyev Ağstafa rayonunda Dilbaz Atçılıq təsərrüfatı üçün yeni kompleksin tikintisi ilə bağlı sərəncam imzalayıb.
Sərəncama əsasən, kompleksin tikintisinə təkcə Kənd Təsərrüfatı Nazirliyinin xəttilə 5 milyon manat vəsait ayrılıb. Rəsmi məlumatlarda qeyd olunur ki, dözümlüyü və dağlıq şəraitdə minik üçün uyğun olması ilə səciyyələnən Dilbaz at cinsinin inkişaf etdirilməsi ilə bağlı Ağstafada 15 hektar ərazidə müasir tələblərə cavab verən təsərrüfat salınıb. Burada ofis binası, qapalı yem anbarı, camaşırxana, tövlələr və digər tikililər var.
Bəs real vəziyyət necədir? "Rupor"a daxil olan məlumatda real vəziyyət əslini tapıb.
Video-materiallar Ağstadakı Atçılıq Mərkəzinin rəsmilərinin mətbuata dedikləri ilə üst-üstə düşmür. Ağstafadakı mənzərənin şahidi olan Azərbaycan atçıları redaksiyamıza ünvanladıqları müraciətdə bildirilər ki, qeyd olunan mərkəzə büdcədən milyonlarla vəsait pul ayrılıb və həqiqətən də beynəlxalq standartlara uyğun kompleks tikilib. Amma Dilbaz cinsli atların əvəzinə iri buynuzlu mal-qara və adi kənd atları saxlanılır.
Kompleksdə 15-20 baş saf cins Dilbaz atı ola, ya olmaya. Sizə təqdim etdiyimiz video materiallarda da bunların şahidi olacaqsınız”. Azərbaycan atçılar aidiyyəti qurumlara müraciət edərək Ağstafadakı Dilbaz Atçılıq Kompleksində acınacaqlı vəziyyətin aradan qaldırılması üçün müvafiq tədbirlər görülməsini xahiş ediblər.
Qeyd edək ki, Dilbaz atlarının uzunmüddətli xalq seleksiyası yolu ilə yaradılıb.
Orta əsrlərdən XIX əsrin sonlarına, XX əsrin əvvəllərinə kimi cinsin köhnə tiplərinin rəngindən asılı olaraq onu “göydəmir”, “göydəmir türk atı”, yaxud sadəcə “boz at” adlandırıblar. 1950-1960-cı illərdə bu at onun əsas vətəni hesab edilən bölgənin adı ilə “Qazax” adlandırılırdı. 1960-1970-ci illərdə müxtəlif sənədlərdə, kitablarda, elmi əsərlərdə “Qazax (Dəliboz)”, “Qazax (Diliboz)”, “Qazax (Azərbaycan)”, “Diliboz” və s. variantlar işlədildi.
